Na december 2022 a tuma luga e “Annual Charity Golf Tournament” na unda cu Rotary Club Aruba a logra recauda mas o menos AWG 100.000,- na fondo. Esaki sigur tabata un exito rotundo, Shelby Maduro Presidente saliente di Rotary Club Aruba ta comenta.
Despues di e evento aki preparacionnan a cuminsa pa e grandioso “Fiesta Rotaria”. E aña aki e di 40 edicion a wordo organisa atrobe despues di 3 aña. Cu e grandioso rifa y e evento mes di “Fiesta Rotaria”, Rotary Club Aruba a logra di recauda mas cu AWG 300.000,- na fondo.
Manera ta conoci Rotary Club Aruba ta yuda diferente fundacion nan den nos comunidad cu sosten monetario pa asina nan por sigui haci e bunita trabao pa esunnan cu mas mester den nos comunidad.
Rotary Club Aruba ta precura pa yuda ariba diferente tereno, manera nos grandinan na Kibrahacha 60+, nos muchanan na Casa Cuna, nos hoben nan na YMCA, esunnan cu discapacidad pero asina mes activo na Sonrisa y Trampolin pa Trabao. Grupo nan di Scouting cu ta yuda nos tur aña na “Fiesta Rotaria”. Esunnan cu ta percura pa alimenta nos muchanan, y hende grandi Ban Uni Man pa Cria nos Muchanan, Meals on Wheels.
E diferente fundacionnan cu nan proyecto special manera Micky’s Foundation, Lean on Me y Leerorkest. Tambe nos a yuda Rode Kruis Aruba, Muchila Creativo, Hunga Teca, Koningin Wilhelmina Fonds, Stichting Edmund Harms, Stichting Sociale Fonds Colegio Arubano y Fundacion Contra Violencia Relacional. Esaki nan ta un par di ehempel di fundacion nan cu ta conta cu e sosten di Rotary Club Aruba.
Ademas e aña aki a logra instala mas waterkoeler na diferente scolnan rond di Aruba. E proyecto aki a cuminsa un paar di aña atras. E ta meta ta pa instala un waterkoeler na cada scol na nos isla. Asina aki promove nos mucha nan pa bebe awa y ta mas sostenibel door di uza un termo.
Presidente Shelby Maduro y su directiva ta termina un aña contento y satisfecho cu e logronan di e Club e aña aki. Un gradicimento ta bay pa tur esunnan cu semper a kere den nos causa y meta, nos sponsornan, comercio di Aruba, tur esunnan cu ta cumpra nos rifa, nos boluntarionan y sigur na nos miembronan. Un danki tambe ta bay na nos partnernan Rotaract Club of Aruba, Interact Club of Aruba Schakel College, Interact Club of Colegio Arubano y Interact Club of International School of Aruba.
